याम्मु साम्सु खेक्तुरो यमिङ खेक्तुरो
सुसुवेङ्बारो लाला वेङ्बार
खेने साम्मेताङ साःनेबा केजङाङ् साःने
साम्सु वान्दुरो युमिङ वान्दुरो
सुलाकले चाःमा युम्माः केबेक्पेन
चाङघी थाङेरो थोबुन थाङे आः
याङमेन्नाङ् तिम्से फक्तुम्माङ् तिम्से
लेक्वा पेगेरो थिक्तङ पेगेरो
नाः लुङ्थुङ नेक्हेक्ते पाङवा नेक्हेक्ते
लेक्वा पेगेल्ले निदङ पेगेल्ले
ना वासाप पेहेक्ते थोलाम पेहेक्ते
लेकवा दाङमारे चमचोक दाङमारे
थो चाङघीरःपेग थोबुरक पेगः
सुसुवेङ लाला वेङबाङ
लेकवा पेगेल्ले सुम्दङ पेगेल्ले
लुङ्थुङ्मा देन्ओ पाङवामा देन्ओ
सिजोक येम्सीङ्लो पेहिक येम्सिङ्
अःया याङ्सिङलो आफेल्ली याङसिङ्
आम्मु सुसुवेङ लाला वेङ
सिक्कुम् तेःसेरो निङ्वा तेःसेरो
मिनुआङ सा हाः नामयुकाङ सा हाः
हन्दगेक सा हाः चुङेक्ले सा हाः
पदःककाङ सा हाः नामयुकाङ सा हाः
यगुदेसुस्याङ चङसी देसुस्याङ
थामेरामाए मानु यम्मा ए
चामाना सा इः मेन्जामा साइ
सिक्लेङमा सा रो मेन्जामा सा रो
सिगिक लेत्थाम्मा यङबङ लेत्थमम्मा
सिक्कुम् मःयेरो निङ्वा मःएरो
लेकवा पेगेरो ङादङ् पेगेआङ्
वया याङसिङ ङाङ् आफेल याङ्गसिआङ्ग
फङदुरा चङधो वेक्तुरा चङधो
फघीया पु रो मागिया पु रो
लेङबी युङेसि युबु युङेसि
सुसुवेङबेल्यः लाला वेङबारे
लेक्वा पेगेमु नुदङ पेगेमु
मिनुरी पु मेन मागिया पु मेन
यगु तेःसुआङ चाङसि तेःसुआङ
मिनु याङसिङ ङाङ् आफेलि याङसिङ
लेक्वा मेम्बेके चम्योक मेम्बेके
अःसा तारुरो योलाम ताःरुआङ
थामेरामाए मानु यम्माए
कङगः आप्मेप्मा सा इः योधुङमा सा इः
चाःमेन्ना सा इः मेन्जामा सा इः
आप्मेमा सा रो योधुङमा सा रो
यगु केःदेसुसि चाङसि केदे
तान्दि ताक्पु मेङघेक्के पेम्बु मेङघेक्के
आःप्ने मेत्तुसि युन्धुङ मःेत्तुसियाङ
लेक्वाग केत्तः थिबोङ दङ केत्तः
आम्बी थामेरामाए मानु यम्मा ए
सावाङ पेःक्ङारो युक्फुङ पेःक्ङा आः
ए नावा यात्नाइग खेम्सीङ यात्नाइग
थिङदाङ पोरा ए आःसा पोरा ए
लिजुम मेन्नेगः लिभोक मेन्नेगः
नावा केन्यात्नेन् खेम्सिङ् केन्यात्नेन्
नाः मिनु पुक्सिमु मुला पुक्सिमु
लिजुम लेक्सुरो लिफात लेक्सुरो
नावाः यात्नाइग खेम्सिङ यात्नाइग
मिनु पुक्सिमु तिङनाम पुक्सिमु
लिजुम मु लत्तु लि मुक्मु लत्तु
लिजुम मु लत्तु लि म
नावा यात्नाईग खेम्सिङ् यात्नाईग
थिङदाङ् बोराए आसाः बोराए
याम्मु तोङचुम मेन्नेगः तोङयाङ मेन्नेगः
नावा केन्यात्तनेन् खेम्सिङ केन्यात्नेन्
मिनु तेम्बेओ साप्चोङ तेम्बे
फेन्केधक्पाहा फेन्दुतिबाहाः
लेकवा मेयुङेरो ङा हिम मेयुङेरो
थो सुसुवेङबारे लालावेङबारे
तासुबु चोगेसुआङ लिसुबु चोगेसुआङ
तोङ्जुम मेधगुआङ तोङयोक मेधगुआङ
तोङजुमगः काप्सिङ तोङयागः काप्सिङ
थो कोइ येत्मेत्थो फाङ्चङ् येत्मेत्थो
अशाःनि पेरो थोलाम नि पे
थो सामथाङ खेवाफाङ लिङदाङ खेवाफाङ
तासोबु चोगुसी लिसोबो चोगुसु
आल्ल थामेरामाए मानु यम्माए
नावा केन्यात्नेन् खेम्सिङ केन्यात्नेन्
थक्लुङ केम्बोङनेन् काबे केम्बोङनेन्
कोइ येप्मेप्मु फांङजंङ येप्मेप्मु
नाः साजारा तेम्बे तुङसाङबा तेम्बे
यो खियोक्वा पाल्य चम्योक्वा पाल्य
खिया सामाबे पङउम थासुस्याङ
थिकचङ कुगोचो तक्के तङनान् नः
आम्मु थिकचङ कुगोचो माःकयु तङनारो
थिकचङ कुगोचो पराः तङनारो
आत्तानः खियोबा पान्ल्य चमयोकप
आल्ल सावाङ पेङाल्यः युक्फुङ पेङाल्ले
नावा यात्नाईग खेम्सिङ यात्नाईग
थिङदाङ पोराए आसाः पोराए
साःवाङ केबेका युक्फुङ केबेका
नावाग केःयातः खेम्सिङग केःयातः
सावाङ मेम्बेकेःओ युक्फुङ मेम्बेकेःओ
खेनेः थाबेआङ होप्लो केम्बाआङ होपलो
सिङगकाङः मेहोप केन्दुम्बोआङ मेहोप
कुन्याआङ मेहोप केन्धानदेआङ मेहोप
याङसिङ आङ मेहोप केन्नेः केन्साआङः मेहोप
थामेरामारः वाःआः केम्मारक वाःआः
थो सिन्युक मेम्बेकेओ मुदेन मेम्बेकेओ
थो सिसा मेयेप्लो मेन्छिन् मेयेप्लो
वाःशा केम्भोत्लो थोलाङ केम्भोत्लो
यो तिमेन मेम्बेकेओ वरङ मेम्बेकेओ
यो सिसा मेयेप्लो मेन्छिन् मेयेप्लो
वाशा केम्भोत्लो योलाङ केम्भोत्लो
पेली फाक्तुसाङ् योबा फाक्तुसाङ्
सुसुवेङबाग लाला वेङबाग
थो सावाङ केम्बारो युक्फुङ केम्बारो
सुसुमाङ मि,रो लिलिमाङ मि,रो
खाम्जुङङाङ् मि,रो खाम्लेपपाङ् मि,रो
यो सुसुम वाःयेरो लिलिम चाःयेरो
खाम्जुम नि चेःयेरो खाम्लेपनी चेःयेरो
याम्मु केःरुङ नेत्तेल्य कुहिक नेत्तेल्ले
सिघि खानाम्ले फेक्का नाम्मारे
मादि खानाम्ले फेक्का नाम्मारे
हुक्सो खेङसिङलो ताङे खेङ्सिङ्लो
थोसो लुङ्मेङग फियाम लुङ्मेङगः
थिङदाङनी वाःरे साःयोनी वाःरे
लेक्वा थक्तुम्मा चम्योक थक्तुम्मा
लाई कुम साःरे फेःमिआङ साःरे
याङमेन लिगेल्य फक्तुङ लिगेल्ले
लेक्वा पेगेल्ले लि,याम पेःगेल्ले
वाःया मेभोक्सुरो याङदाङ मेभोक्सु
साम्सु मेवान्दुरो युःमिङ मेवान्दु
सुत्छुरुबामु सुःहाम्फेबामु
साम्सु मेधेक्तु युःमिङ मेधेक्तु
च्वाःत केफात्मेल्लो वाःफात्तिम्मेन्
सेजोरा मेल्लो कुईङ मि,मेन्न्
च्वाःत फात्छेगमु फःयो पे,सियो
आबु लाःरेरो साःरुङ लाःरेरो
केरुङ नेत्तेरो कुहिम नेत्तेरो
आङदुकाङ नेत्तेरो साः हाम्माङ नेत्तेरो
सुसुमाङः मिःसे लिलिमाङ मिःसे
खाम्जुङमाङ् मिःसे खाम्लेप्पाङ् मिःसे
खाम्जुङ मे,हुरु खाम्लेप मे,हुरुआङः
सुसुम आङ चेःयेरो लिलिमआङ चेःयेरो
खाम्जुम चेःयेरो खामलेप चेःयेरो
सिधि खानाम्ले फेक्का नाम्मारे
मादि खानाम्ले फेक्का नाम्मारे
हुक्सो खेङ्सिङ्लो ताङे खेङ्सिङ्लो
थिङदाङ वाःरेल्ले साःयो वाःरेल्ले
लाइकुम साःथिक फेमि आङ साःथिक
लेक्वा पेगेल्य नि,यान पेगेल्ले
वाःया मेयुक्सु याङदाङ मेभोक्सु
साम्सु मेवान्दु युःमिङ मेवान्दु
थोसु खेवारो साम्दाङ खेवारो
साम्सुरक इङेरो युःमिङरक इङेः
चुक्मु मेनेन्छिङ् हिङ्मु मेनेन्छिङ्
थो लुङ्थुङ मेनेत्लो पाङ्वा मेनेत्लो
सुसुवेङबाग लाला वेङवाग
सावाङ केम्बागः युक्फुङ केम्बागः
साःयोक खिम्मारे योहिप मेबेआङ
ङायोक खिम्मारे योहिप पाङमारे
यो लेक्वा थुक्नुरो चमयोक थुक्नुरो
योसु लुङमे ओ मुक्कुम् लुङमे ओ
लाङफोलो फोलो थाक्साङ युङेल्ले
हुक्फोलो फोलो खिजङलत युङे
याःसा आङ साःन खिःरे आङ साःन
लेक्वारक तेःयेरो चमयोकरक तेःयेरो
याम्मु थाक्चुम चेःरुरो थाक्साङ चेःरुरो
योसु लुङमेल्य मुक्कुम् लुङ्मेल्ले
खियाः सामाबे पङउम मे,देःयेरो
माङ्वा पुःरुसी कुदक पिःरुसी
लेक्वा मेत्तुसीरो इजिङ मेत्तुसी
सावाङ् केम्बेन्न् युक्फुङ केम्बेन्न्
वाःसारक तेःयेरो यो लामरक तेःयेरो
सक्वा मेधाक्तु मइङ मेधाक्तु
थामे कुसिक्नी मायो कुसिक्नी
नालिथिक येप्लो थाङ्बेन थिक येप्लो
पेलि मेफाक्तु योबान मेफाक्तु
खियाः सामाबे पङउम मेदाःरु आ,
याङसा केजोक्पाने कुन्धे केजोक्पाने
सावाङ केम्बाआ युकफुङ केम्बाआ
पेलि फाक्तुसिरो योबान फाक्तुसि
कोचो मेन्नेग खियाः मेन्नेग
सावाङ मेम्बेक्नेन्न् युक्फुङ मेम्बेक्नेन्न्
खियाः सामारो पङउम थासुसी
सेखानु खानु कुनु माङसेक
सावाङ केम्बारो युकफुङ केम्बारो
याःसा आङ साःरो खिःरे आङ साःरो
आप्मेत मेमेत्तु युन्धुङ मेमेत्तु
आप्चे फिन्दुरो पुङःमि फिन्दुरो
लाशा मेःज्येरो कु,शा मे,ज्येरो
इगेन चोगुल्ले तगेन चोगुल्ले
योसु लुङमेन्नाङ मुक्कुम् लुङमेन्नाङ्
आ,वुरक ला,रु रो सा,रुङरक ला,रुरो
केरुङ ङाङ् नेत्तेरो कुहिम नेत्तेरो
आन्दुकाङ युःङे साहाम्माङ युःङे
हाङ्गेन्लक पोक्लो सिक्चारक पोक्लो
वःरा रक लो,रो पित्तथुमरक लो,रो
याङसा चोक्माःआङ कुन्धे चोक्माःआङ
सुसुम मिःसेरो लिलिम मिसेल्ले
सु, सुम्मु खु,रु लिलिम मुः खु,रु
खाम्जुङ मिःसेल्ले खाम्लेप मिःसेल्ले
वाःया नेमेन्ना खाम्खु नेमेन्ना
साप्मा नेमेत्ना माङ्खु नेमेत्ना
नासिङ केःहङमेल्लो च्वाःत केफात्मेन्लो
सावाङ केम्बारे युक्फुङ केम्बारे
नाइगेन् यान्दुरो तगेन् यान्दुरो
आबु ला,रेरो सारु,रुङ ला,रेरो
योसु लुङमेल्लो मुक्कुम् लुङ मेल्लो
लेक्वा केःरेरो येत्लानी केःरे
खाम्जुम्माङ चेःयेरो खाम्लेपाङ चेःयेरो
लेक्वा केःरेरो नु,ला केःरेरो
आबु आङ पो,रेरो सारुङाङ पो,रेरो
थिङदाङ सादुङले साःयो सादुङले
हुक्सो तेम्सुरो ताःङे तेम्सुरो
सिधि खानाम्ले फेक्का नाम्मारे
मादि खानाम्ले फेक्का नाम्मारे
हुक्सो खेङ्सिङ्लो ताःङे खेङ्सिङ्लो
थिङदाङ कत्तेन्न् साःयो कत्तेन्न्
तुङगाली माथिक सिम्बुली माङ्थिक
याङमेन लिगेरो फक्तुङ लिगेरो
लेक्वा पेगल्य सुमयान पेगेल्ले
वःया मेभोक्सुरो याङदाङ मेभोक्सु
साम्सु मेधक्तुरो युःमिङ मेधक्तु
तेत्लारामाग लाहादोङना रो
साम्सु इङेन्न् युःमिङ इङेन्न्
सिक्कुम् मे,देसे निङ्वा मे,देसे
आबु केःलापेन् सारुङ केःलापेन्
साजारामाग कुगेक फाःमेन्न्
साम्मेताङ तोःसेरो केजःङाङ तोःसेरो
सु–सुम्माङ मिःसेरो लिलिममाङ तोःसेरो
हाङगेन्लक पोक्लो सिक्चारक पोक्काः
याङसा मेत्माआः कुन्धेः मेत्माआः
हुक्सो तेम्सुरो ताङे तेम्सुरो
थिङदाङलक कत्ते साःयोरक कत्ते
तुङगुली माङ्थिक सिम्बुननाङ् माङ्थिक
लाईःकाङ साःथिक फे,मीआङ साःथिक
याङमेन लिगेल्य फक्तुङ लिगेल्ले
यो लेक्वा पेगेल्ले लिःयान पेःगेल्ले
वःया मेभोक्सुरो याङदाङ मेभोक्सु
योसु खेवारो लिङदाङ खेवारो
साम्सु मेघेक्सु युःमिङ मेघेक्सु
सामसुरामाग युःमिङ इङेल्ले
सावाङ केम्बारे युक्फुङ केम्बारे
सुसुवेङबारे लाला वेङबारे
सावाङ केम्बारे युक्फुङ केम्बारे
तइ केबेकपा थिक नाम्गेन केबेक्पा थिक
पेःहे हाङ्मारो तेन्दुरामाथिक
तइ केबेक्मा नाम्था केबेक्मा
सेगेकवामारो याङलकवामा थिक
सेवा थासुस्याङ सेन्दो थासुस्याङ
योसु लुङ्मे, ओ मुक्कुम् लुङ्मे,ओ
सावाङ पेःङारो युक्फुङ पेःङारो
लाङबन पिःराङे चाःसाक पिःराङे
थोसु लुङ्मेल्ले फियाम लुङ्मेल्ले
लाङ्बन केःबिरो चेःसाक केःबिरो
लाङ्बन मेम्बुरुन चेःसाक मेम्बुरुन
च्वाःफात्छेगर फ,यो दाङमेन्न्
लाङ्बन नाक्तुरो चाःसाक नाक्तुरो
लाङ्बन मेम्बुरुन चाःसाक मेम्बुरुन
सिङ केहङमेल्लो वाधोलुङ् मेन्नाङ
लाङ्बन नाक्तुरो चेःसाक नाक्तुरो
लाङ्बन मेन्नेरो चेःसाक मेन्नेरो
तिङ्दिङ् मेयुक्सीङ नाहेन मेयुक्सीङ
थोसु लुङ्माआः फियाम लुङ्माआः
योसु लुङ्माग मुक्कुम् लुङ्माग
तिङ्दिङ् मेयुक्सीङ नाहेन मेयुक्सीङ
सावाग केम्बेन्ल्लो युक्फुङ केम्बाग
सुसुवेङबाग लाला वेङबाग
थो तिमिक्सोगर कामदकलाङ्बेल्ले
सावाङ थासिङलो युक्फुङ थासिङलो
लाङ्बन मेन्नेरो चेःसाक मेन्नेरो
याःसा नात्नुरो खिःरे नात्नुरो
थो तकतक नात्नुरो पेःङ्वा नात्नुरो
लाङ्बनले त,रु चेःसाकले त,रु
येत्चिरिमेत्थो येत्लाम थोमेत्थो
थो काम्बत्लीङ मेल्ले खेवा सुमेल्ले
सावाग हिङसुरो येत्नामग हिङसु
पेगि पेगेल्ले फाङ्नाम् पेगेल्ले
नु,सु चङमेत्थो लिङघा चङमेत्थो
मिनु तेम्बेत्थो थोक्चङ तेम्बेत्थो
सुसुवेङबाग लाला वेङबाग
सावाङ केम्बाग युक्फुङ केम्बाग
तिमिक्सो बेल्लो कामदक लाङबेल्लो
लाङ्बन मेन्नेरो चाःसाक मेन्नेरो
ताःसो सामाबे तक्साङ येम्सीङ ङाङ्
लिःसो सामाबे तक्साङ येम्सीङ ङाङ्
यगुनी पेःरो चङसीनी पेःरो
लाङ्बन मेन्नेरो चाःसाक मेन्नेरो
यगुमा तेन्थो चङसित्मा तेन्थो
तरङ खियाःहा ताङसाङ खियाःहा
थो कोइ मे,लारसेरो फाङजङ मे,लारसेरो
थाबु मे,लारेरो सिङलाङ मे,लारेरो
हिल्ली येप्मेपमु याक्सो येप्मेप्मु
वःशा मेबेरो यो लाम मेबेरो
थो सिन्युक मेबेरो मुदेन मेबेरो
थिकचङ कु,गोचो तेक्के तङनान्
यो थामे युङमेओ मायो युङमेओ
कोइ यो लाङघेङ अत्तु थासिङ ङाङ्
तोःतोः लाङघेङवा सामनुङ थासिङ ङाङ्
मुजिङनामाए खेयोङनामाए
थिङदाङ पोःराबेन केःसा पोःराबेन
इ,गे लामारे कुन्जुपसेमारे
तिङ्दिङ् मेयुक्सीङ नाहेन मेयुक्सीङ
लाङ्बन मेम्बुरुन् चाःसाक मेम्बुरुन
थो नु,सु तेम्बेमा लिङघायक तेम्बे
मिनु तेम्बेओ थोक्चङ तेम्बेओ
यगुनी पेःरो चङसीनी पेःरो
पेली फक्तुल्ले योबान फाक्तुल्ले
खेःने थिक्चङ कुचोग तक्के तङनामे
लोक्फा कोःसेओ सिङघिम कोःसेओ
पेलि फाक्तुरो योबान फाक्तुरो
सिक्कुम् ते,सेरो निङ्वा तेःसेरो
मुजिङ्नामाग खेयोङ्नामेङगः
थोसु लुङ्मेत्थो फियाम लुङ्मेत्थो
वाःसा पेःगेआङ थोलाम पेगेआङ
थिङदाङ पोराबेन आःसा पोराबेन
वाःसा केभोत्छुम थोःलाम केःभोत्छुम
लाङ्बन केम्बुरुम्मेन् चाःसाक केम्बुरुम्मेन्
लुङ्धुङ चोगिन्योः काइ, चोगिन्यो
यो थिली पोक्सीन्यो चबेत पोकसीन्यो
थो सकवाः मेत्तुसी मु,इङ मेत्तुसी
सेक्खारामाग खेङगा थासुसी
योसु लुङ्मेओ आङ मुक्कुम् लुङ्मेओ आङ
वाःसा थाःसिङाङ् योलाम थासिङङाङ्
थिङदाङ पोःराबेन आःसा पोःराबेन
वाःसा केःभोत्छुम यो लाम केःभोत्छुम
लाङ्बन केम्बिरुम्मेन् चाःसाक केम्बिरुम्मेन्
थो सक्वा मेत्तुस्याः मु,इङ मेत्तुसी
थिङदाङ पोःरा हा, खेःनि साः पोःरा हा
लुङ्धुङ मेजोक्लः काइ, मेजोक्लः
पेलि फाक्तुसि योबाः फाक्तुसि
मुजिङ्नामेल्ले खेयङ्नामेल्ले
थिङदाङ सिःमेत्थो साःयो सिमेत्थो
वाःसा पेगेआङ थोलाम पेगेआङ
कुनक चङङेन्ग लावाखे पोक्से
कुहाः हाङ्मेङग चेल्लुङ पोक्सेरो
कु,सिङदाङ्मेन्ग खक्लुङ पोक्सेरो
पेलि फाक्तुआङ योबा फाक्तुरो
कु,हिदुतेन्लो चिमचिम पन्नारो
कुधेङाङ मेङगः केङभन पोक्सेआ
कुधिखेक्पेल्लो खिःचो पोक्सेरो
कुबिम्बेन्गमु साङफे पोक्सेमु
लाङ्बन मेन्नेरो चाःसाक मेन्नेरो
यगु केम्देसेः चङसी केम्देसे
खेनेःससिक पोक्सेओ यङदङ पोक्सेओ
नाःसो पोक्सेओ थपन पोक्सेओ
मुजिङ्नामाग खेयङ्नामाग
थो चेल्लुङ पोक्सेओ खक्लुङ पोक्सेओ
पेलि फाक्तुस्याङ् योबान फाक्तुस्याङ्
कोइ यो लाङघेङ आत्तु थासिङ लो
तोः तोः लाङघेङवा साम्नुङ थासिङाङ्
थिलि फुक्कोमु यङदङ फुक्कोमु
यःगुनी पेःरो चङसिनी पेःरो
खान्निन्ग खाप्पु पोक्सेरो सुःगुप पोकसेरो
खिजोरामारो लुपलिङ् हाङ्,मारो
थोसो लुङ् मेन्न फियाम लुङ् मेन्न
योसु लुङ् मेन्नु मुक्कुम् लुङ् मेन्न
थिङ्दाङ पोःराहा साःयो पोराहाः
भूमी सौदेन याक्थुङ लिम्बू
यभत्लुङ फावामा
